أجمل هديه لطفل من عمر سنتين واكبر



كثير نحتار وش ممكن هذا الطفل تناسبه هديه 

بذات لما ماتعرف اهتماماته اشوفه نهايه الاسبوع وسط جمعه واطفال 

مايمديك تميز وش يحب وش يفضل 

كثير العاب لما نجيبهم ماتحس بالفرحه او طفل يبي مثل لعبه الثاني وحتى اللعبه مرات ماتنمي فيه شي 

فكرت اهدي عيال وبنات اخواني الصغار هديه شي يشدهم وينشغلون فيه ويستمتعون 

والي توصلت لك قصص شدتني انا قبل حتى افكر فيهم 

رسوماتها نوعيه القصه و حتى جوده الكتاب جمييل واسعارهم من 25 واقل 

حبيتهم مره اخذت مجموعه و اضفت عليها كتب تلوين وفيها الوانها 

وغلفتهم بجد حبوها وفتحوها متحمسسسين 






والاكيد كلها فايدة 

فايدة تربويه ياخذها من القصه و يوسع له خياله مع الرسومات وتخيل القصه وتخليه يفكر بالاحداث وممكن يطرح حلول 

للمشاكل الي في القصه قبل لاتنسرد عليه كامل القصه وهالشي مره مفييد 

ومهم لما تشتري قصه تكون رسماتها تشد بالبدايه لين الطفل يتعلق بكتبه وقصصه ومنها يكون فعلا قارئ بالمستقبل 

وبسس والله بطلنا حلويات و العاب القصص جميله ومفيدة 

وبكل مكان تحصلونها بس من المهم تقرا القصه قبل الطفل وتحسن اختيار الكتب من حيث الرسوم وجوده الورق 

اتمنى تطبقوها وتنمو حب القراءة عند اطفالكم 

azhar 



ونجدد المدونه

صباح الفل


واخيرا لقيت قالب يعجبني بطريقه العرض


يبيله شوي تعديل ويضبط بإذن الله


ان شالله يعجبكم 


2017 سنه احياء الهوايات




انقطعت فترات وارجع كل مره بس ما استمر
لما كنت مستمر وصلت المشاهدات لليوم الواحد لاكثر  4 الاف
وقل العدد مع قله تدويني واتجاهنا للتطبيقات
لما اتصفح مدونتي اتذكر السعاده الي تجيني وقت ما ادون والقى مشاهدات عاليه بالنسبه لمدونه بسيطة وغير مشهورة واهتماماتي متنوعه مع ذلك كان كثير يدخلونها

2017 سنه احياء الهوايات

التدوين والقراءة والتصوير التصميم الوصفات و الاكل الصحي والرياضة التلوين والرسم

 بانسق وقتي باذن الله وبرجع انزل تدوينات واصور وكل الهوايات راح ارتب لها وقت بإذن الله
اتمنى تشجعوني وتكتبون لي تعليق يفرحني ع اي تدوينه تعجبكم او فادتكم

azhar 


فكره لــ هديه رمضان - الجزء الاول



السلام عليكم ورحمه الله وبركاته 

بما ان رمضان قرب الله يبلغنا اياه على عفو وعافيه يارب 
حبيت اكتب هالتدوينه 
عن هدايا رمضان 
من العادات الجميله الي شفناها عند بعض دول الخليج ( في السوشل ميديا )
قبل رمضان بايام او بأول ايام رمضان يتبادلو هدايا لاستقبال رمضان 
مثلا سله فيها تمر مصاحف جميله فوانيس وسجاد 
وغير الي يبالغو وتصير شي ممكن مانستفيد منه زي ستاند مكتوب عليه رمضان ومنحوت هلال 
  وفيه كم وردع مع شكولا احسسه جدا مكلف و مايستفاد منه ابدا 
الحلو بهدايا رمضان انها تكون بسيطه وبنفس الوقت مفيده يعني نستخدمها 

نوزعها على جيراننا اقاربنا اصحابنا تزيد الالفه بيننا وتبين وش كثر احنا نهتم لهم 

بصراحه راح اكتب لكم تخطيطي في هالتدوينه والتنفيذ بتدوينه ثانيه 
لاني للحين ماكملت كل الاغراض 

مفكره ب صندوق او علبه  او (ممكن  اغلفها بسولفان مره وحده بدون شي  ) راح تحتوي على 
سجاده صلاه 
سبحه 
حقيبه رمضانيه ( اذكار الصباح والمساء وامساكيه رمضان - بارفق صورها بالتدوينه )
مغلف تمر 
علبه عود 
مصحف 

امممممم  هذا الي كتبته واذا فيه اقتراحات اتمنى تكتبون لي 
حاليا السجاد والحقيبه الرمضانيه هم الي موجودين 

بالنسبه للحقيبه فكرتها كالتالي 
ملف صغير فيه إمساكيه رمضان و أذكار الصباح والمساء وفاصل قرآني و دعاء الختمه 

فكرته جميله و مفيده 










تحصلونها في حكايه ( hekayaty4@ ) الحساب بالانستغرام



بقيه الاغراض جاري العمل عليها

نشوفكم بالجزء الثاني 

بطاطس على طريقة افنان الغامدي






صباح الخيير 

الساعه 1 ونص ماتعشيت فجاه وانا اشوف المسلسل 

اشتهيت بطاطس تذكرت حساب افنان رحت ادور عالوصفه 

ووو ع طول طبقتها واستمتتتعت 


بختصار 

بطاطس اصابع و ملعقه زيت وندخلهم بالفلبس 

بالوقت هذا نحمس بصل لين يتكرمل ونحط عليه ثوم 

وملعقتين كتشب وشويه شطه رنا ومايونيز وشويه بهار 

وبس يخلص البطاطس نحطه الخلطه ونقلبه وبعدها نقدمه بصحن 

وشويه جبن يمممي 

ولا الذ 


برجر صحي من صنع يدينك


صباح الخيير  

موضوعنا لذيذذ عالصبح 

كثير يحبون البرجر وكثير منتشرة محلات البرجر في الثلاث سنوات الاخيرة 

لدرجه مرات بين محل ومحل كم متر 

طبعا نعرف في المطاعم ان البرجر كلما كانت نسبه الدهون فيه اعلى كلما كان اطرى والذ ويبقى فتره اطول بالطراوه 

لدرجه توصل نسبه الدهن 40% 

فاذا انت تعشق البرقر او اهلك او الصغار 

نصلحه في البيت نظيف صحي لذيذ واكييد ممتع 

صدقوني مره سهل وسريع 




المهم نجيب لحم مفروم طازج ناخذه من لبون او وسمي او حتى لو ذابحين ذبيحه خوذو منها لهم وافرموه 

وبس هذا المكون الرئيسي والاهم 


بكتب لكم طريقه الحمه :

اولا المقادير لحم مفروم صحن او صحنين حسب الكميه الي حابين 

بقدونس نص كوب الى كوب حسب كميه اللحم 

ملعقتين كتشب 

بصله كبيره مفرومه بالفرامه ومنشف مويتها 

2 ملعقه سماق 

ملح ، فلفل اسود ، ثم بودره 

الطريقه 

نفرم البصله ونحاول نشيل مويتها  ثم نضيف عليه بقيه المقادير ماعادا اللحم المفروم  ونفرمهم بالخلاط 

نضيف الخليط عاللحم المفروم ونعجنه زين  



الحين مهم ناخذ شوي من لحم البرقر ونحجربه بالقلايه شويه زيت وتقلب قطعه صغيره علشان نذوق اللملح وطعمه 

وبس يكون البرقر طعمه مضبوط الحين نشكل البرقر ونخدله بالثلاجه قبل الشوي 

واذا بتحطونه بالفريزر لاستخدام لايام جايه ممتاز اهم شي تغلفونه بشكل كامل 



نترك البرقر لساعه او ساعتين بالثلاجه ولو مستعجلين حطيه بالفليزر بس يمسك استخدميه  نختصر الوقت كذا 

نجي عالخبز وهو شي مهم بالبرجر 

وانا صراحه احب نوع خبز برجر ممتاز طري ولذيذ ومنه احجام 

وهو خبز البرقر الي من اليورمارشيه  احبه 

بالنسبه للحم ممكن تشويه عالجمر وومكن مسحه زيت بالقلايه ونقلبه لين يستوي 

وبس خبز و لحم البرجر و طماط وخس وجبن والبرجر جاهز 



ولو حابين شوية لذة لبرقر مميز سوو بصل مكرمل وضيفوه للبرجر 




وبالعافيه

  ملاحظه  اشتهيت البرقر وانا اكتب هالتدوينه  هههههه 

القهوة الفرنسية طريقتها و من وين أخذها .؟




صباح الخير تحتاج لكوب قهوه علشان فعلا يكون خير 

نحتاج نصحصح بذات أمثالي للاسف انا اسهر طول السنه والصباح اعشقه لكن دايما اكون نعسانه 

فحتاج هالفنجال او كوب قهوه يصحصحني ويعطيني صباح جميل 

وكلن له قهوته المفضله 

وقهوتي المفضلة هي القهوه العربيه 

ولكن العصر ماحب اشربها افضل اي قهوه ثانية عليها 

معرف ليه فترة العصر عندي مايناسبها العربي

وغالبا افضل القهوة الفرنسيه في هالوقت 


ببساطه احب نكهتين اخلطهم سوا الي هي قهوة فرنسيه بالبندق والثانيه بالشكولا اخذهم من الرفاعي

للفجال ملعقه من القهوة مع قد الفنجال مويه بحرارة المطبخ ( عاديه يعني من الفلتر 

ونحطها عالنار مجرد تقلب نرفعها ونرجعها تقلب مره ثانيه واخليها ع جنب 

وبهالوقت اسوي شويه حليب اسخنه مع شويه سكر 

وبس تركد القهوه اصبها في فنجالي مع الحليب 






كتاب ثم ماذا ؟



مساء الفل 

كتاب ثم ماذا ؟

من تأليف إياد عبدالحي 

كتاب خفيف سريع تحتوي كل صفحه على عبارة وحدة باللغه العربية والإنجليزية 

مقتطفات منه اعجبتني 

كن كالشمس في مغيبها وأنت تغادر المكان دع الكل يتاملك بابتسامة !

من يمعن النظر في الماضي يحتاج لنظارة عدستها مصنوعة من الزهايمر ..!

دعك من الماضي فالاهم ما أنت ماض إليه 

أن تقول صوابا ثم لاتجد له منصتا ذلك افضل من أن تقول الخطا فيسمعك الكل !

أجمل ما قرات : وجه امي 


الكتاب 213 صفحه يعني 213 عبارة تقريبا 

تقييمي له 6/10 
اخذته من جرير وسعرة 30 ريال 


كتاب تسكع على الخريطة


السلام عليكم ورحمه الله وبركاته 

قررت اكتب رايي بالكتب الي بقراها هالسنه وبصنفها باسم كتب وهذا  اول كتاب 

كتاب تسكع على الخريطة 
صراحه مدحة حسن عبدالله بسنابه 
وبصدق كتااااب ممتع جدا لدرجه خلصته بنفس الليله ماقدرت اقااومه
 طبعا الكتاب للرحالة عبدالكريم الشطي
 تكلم فيه عن كم رحله من رحلاته وتخللها نصوص تاريخيه شدتني كثيير 
كتابته جذابه ومشوقة وسهله بسرعه تستوعب يعني سلسه جدا 
حبيته مره بذات الجزء الي تكلم فيه عن الماتشو بيشو (قصتها تاريخيا )
وشدتني المعلومات الي كتبها في جزء الحج إلى اسبانيا  ( عن المسيحيه ) 
واحس الي يحب السفر واستكشاف اماكن 
و يحب القصص التاريخيه عن مدن قديمه
 راح يعجبه الكتاب مره ويمكن بعد مايخلص الكتاب
يروح يفتش عن رحله له ههههه 
والله شوقني اسافر مرره وازور اماكن تاريخيه 
سعر الكتاب 55 اخذته من مكتبه جرير 

سنه خير وامطار


صباح الفل  صباح الامطار 

ماشالله هالسنه امطارها كثيرة وجميله 

وفصل الشتاء جميييل 

اول مره بحياتي احبه 

استمتعت فيه كثير 

وهذي كم صوره لفطورنا بصباح ممطر في المخيم 




تسوق الكتروني - موقع وجوه



مساء الخير 

دايما اتسوق من النت اذا كان الغرض مو متوفر عندنا 

غالبا افضل اشوفه عالطبيعه واجربه 

زي مثلا المنتجات الي بمحل وجوه 



اشتري من نفس المحل مافكر اطلب اون لاين ابدا 

جاتني رساله الكترونيه منهم بخصم فهنا قررت استفيد من الخصم 

وبمنتجات انا احتاجهم وشايفتهم ومجربتهم 

فطلبت من الموقع وكان مره سهل و بسرعه وصلتني الاغراض وكان توصليلهم مجاني 

ومعاهم كم منتج للتجريب 

بصراحه احب فكرت النقاط وتجميعهم وبالاخير ناخذين لك عطر مجاني قيمته 450 وناسه 

دامي شاريه شاريه فليه لا النقاط جميله 

 حبيت التجربه واكيد لو فيه عروض بكررها او بدون دامه تجيني للبيت ولا احلى 





البيتزاء اللذيذة عجينة رقيقة ولذيذة وسهلة





مرحبا 

اليوم بكتب عن عجينة بيتزاء خفيفة ورقيقة وسريعه 
مع اي حشوة لذيذة وسهله تحبونها 

اتمنى تعجبكم 

عجينة مناقيش 
4اكواب طحين
2ملعقة طعام خميرة
2 ملعقة طعام سكر 
2 ملعقة شاهي ملح 
1 كوب حليب بودرة
2 كوب ماء دافي 
نص كوب زيت 

الطريقة 
نخلط المقادير الجافة  وبعدين نضيف الموية والزيت ونعجن المقادير 
بعدها نغطي العجينة ونخليها تتخمر ساعه كامله وبعدها نقسم العجينة لكور
ونفرد شكل دائري ونحشيها ونحمرها من تحت ثم بعدها من فوق 













وبالعافية 

كيكة البف باستري




صباح الخيير 

قبل يومين شفت بسناب صديقتي نوف هالكيكة وحبيت شكلها المبهر

وعطتني طريقتها  حبيت طعمها وهي تحتاج تدبلي الصوص 

انا احب الكيكة رطبة يعني ماحب الجافه ناشفه 

المهم معرف كيف اشرح كيف تضبطون الشكل بس بكتب مثل مارسلت لي نوف 

المقادير :

بالخلاط ( علبه زبادي ونفسها سكر ونفسها زيت 
وثلاث بيضات ) ونخلط 
ثم نضيف عليهم علبه ونص طحين وملعقة بكنج بودر ) ونخلط 

تدخل بالفرن وبعدين تخلينها تبرد وتفتحينها من الوسط وتحشيها شوي من الخلطة 

الخلطة : 
( 3 ظروف دريم ويب 
6 حبات جبن مثلث
علبة قشطة
بيالة حليب سايل بارد
فانليا  ) ونخلطهم زين 

بعدين نغطي الكيكه بالخلطة الباقية 

ونقطع البف بستري 16 قطعه مثلثه وندخلها الفرن وبعد ماتتحمر وتنتفش 

نصفها عالكيكه والباقي نفتته ونحطه عالجوانب 

ثمنصب عليها صوص 
( عالنار نص كاس سكر مع شوي ماء 
اذا ذاب السكر وبدا يغلي وبدون مايتغير لونه نضيف نص علبه قشطة ونحرك ) 

وبالعافية 


برد توك BreadTalk خفايف مالحه وحالية






صباح الخيير 

رجعنا لكم مع برد توك من جديد 

بتكلم اول شي كيف عرفته 

بصراحه انا مادخل مكان الا سامعه عنه او شايفه دعاية او اسمه مالوف او يوحي بنوع المحل

يعني مستحيل اقراء الاسم وانا بالشارع و انزل للمحل وانا معرف وش يقدم ونوعية الاكل 

فمرة قالي اخوي انو كان جوعان ومره وذاق منه وعجبته 

ومن هنا بديت اجرب كل مره شي 

حبيت الحلا عندهم الكيكه اليابانية و  فطيره تفاح بالقرفه 



وحيبت الموالح مثل البف بستري بالزعتر ووو بعض فطاير الاجبان 

ماحبيت المسخن ابدا معني كنت متحمسه اذوقه 

بصراحه جميل المحل ومنتجاته  لكن شوي دسم بعض المخبوزات 

امممم كان ودي لو كتبت عن كل نوع وصورت لكن دايما يصادف جوع ههههههه

او مستعجله فما افكر اصور التفاصيل كامله 

فاخليلكم هالمجال تجربو وتكتبو لي في التعليقات